කෘෂිකාර්මික නිෂ්පාදන සඳහා ගැනුම්කරුවන් සොයා ගැනීමට ක්‍රම පහක්

මෙය සැබවින්ම ව්‍යාපාරයේ වැදගත් මෙන්ම දුෂ්කර කොටසකි. ගැනුම්කරුවන් නොමැතිව ඔබට ව්‍යාපාරයක් නොමැත. ඔබ ඉලක්ක කිරීමට යන්නේ සිල්ලර ගැනුම්කරුවන්  ද තොග ගැනුම්කරුවන් ද යන්න පළමුව ඔබ තීරණය කළ යුතුය. එය මත පදනම්ව, ගැනුම්කරුවන් සොයා ගැනිම සඳහා ඔබේ උපාය මාර්ග වෙනස් කිරීමට සිදු වේ. කෙසේ වෙතත් ගැනුම්කරුවන් සොයා ගැනීමේ වඩාත් පොදු ක්‍රම මෙහි සඳහන් කර ඇත. මින් කිහිපයක් හෝ එකක් භාවිතයෙන් ඔබටත් ගැනුම්කරුවන් සොයා යා හැකිය. 

1. කඩ සාප්පු සහ සුපිරි වෙළඳසැල් සමඟ සෘජු සාකච්ඡා. - ඔබේ නිෂ්පාදන විකිණීම සඳහා ඔබේ පුද්ගලික සම්බන්ධතා භාවිතා කර සමහර වෙළඳසැල් සහ සුපිරි වෙළඳසැල් සමඟ සාකච්ඡා කළ හැකිය. නිසැකවම ඔබට  ඔවුන්ට යම් කොමිස් මුදලක් ලබා දීමට සිදුවේ. සිල්ලර වෙළඳපොළ ඉලක්ක කර ගත් කුඩා පරිමාණ ව්‍යාපාර සඳහා මෙම ක්‍රමය වඩාත් හොඳ ය. සමහර සුපිරි වෙළඳසැල් වල, ඔවුන් සෑම වසරකම ඔවුන්ගේ වෙබ් අඩවිය හෝ අයදුම්පත් හරහා සැපයුම්කරුවන් ලියාපදිංචි කරයි. ඔබට එහි ලියාපදිංචි වී ඔවුන් සමඟ ව්‍යාපාර ආරම්භ කළ හැකිය. ලංකාවේ කීල්ස් සහ කාර්ගිල්ස් ආයතන වල වෙබ් පිටු හරහා ඔබට ලියාපදිංචි වීමට හැකියාව පවතී. 

2. සමාජ මාධ්‍ය හරහා - ඔබේ නිෂ්පාදන සඳහා ගැනුම්කරුවන් සොයා ගැනීමට සමාජ මාධ්‍ය පහසුවෙන් භාවිතා කළ හැකිය. නමුත් මෙය කුඩා පරිමාණ ව්‍යාපාර සඳහා වඩාත් සුදුසු ය. ඔබට ෆේස්බුක් පිටුවක් (Facebook page) ආරම්භ කිරීමට, හා නිෂ්පාදන ගෙදරටම බෙදා හැරීමේ ක්‍රමයක්  හරහා ඔබේ නිෂ්පාදන ප්‍රවර්ධනය කිරීමට සහ විකිණීමට හැකිය. කෘෂිකාර්මික නිෂ්පාදන ආනයනය හා අපනයනය සඳහා නිර්මාණය කරන ලද සමහර ෆේස්බුක් කණ්ඩායම් (facebook groups) සහ වට්ස්ඇප් කණ්ඩායම් (WhatsApp Groups) ද ඇත. ඔබට මෙම කණ්ඩායම්වලට සම්බන්ධ වී සමහර ජාත්‍යන්තර ගැනුම්කරුවන් ද අල්ලා ගත හැකිය. සමහර ව්‍යාජ ගැනුම්කරුවන් සිටින බැවින් මෙම කණ්ඩායම් තුළ ප්‍රවේශම් වීමට වග බල ගත යුතුය.

3. E-Commerce / ඊ-වාණිජ්‍යය වෙබ් අඩවි - අපි හැමෝම මේ ආකාරයේ වෙබ් අඩවි ගැන හුරුපුරුදුය. B 2 B සඳහා වෙබ් අඩවි ද B 2 C සඳහා වෙබ් අඩවි ද ඇත. ඔබට පහසුවෙන් සැපයුම්කරුවෙකු හෝ විකුණුම්කරුවෙකු ලෙස ලියාපදිංචි වී ඔබේ නිෂ්පාදන විකිණීම ආරම්භ කළ හැකිය. සාමාන්‍යයෙන් මෙම වෙබ් අඩවි සියල්ලම නොමිලේ ලියාපදිංචි (Free Registration) කිරීම සපයයි. කෙසේ වෙතත් ආරම්භයේදීම ගැනුම්කරුවන් ආකර්ෂණය කර ගැනීමට එම නොමිලේ ලියාපදිංචිය ප්‍රමාණවත් නොවනු ඇත. එබැවින් සමහර ගැනුම්කරුවන් ආකර්ෂණය කර ගැනීම සඳහා ඔබට මුදල් ගෙවා සාමාජිකත්වය (Premium Membership) හෝ වෙළද දැන්වීම් (Advertisements)  ලබා ගැනීමට සිදු විය හැකිය. කෘෂිකාර්මික නිෂ්පාදන සඳහා සුදුසු හොඳම ඊ-වාණිජ්‍ය (Ecommerce) වෙබ් අඩවි 5 පහත දක්වා ඇත. 

i. Alibaba 
ii. Go4worldbusiness
iii. IndiaMart
iv. Globalsources
v. ebay

4. කෘෂිකාර්මික ප්‍රදර්ශන / වෙළඳ ප්‍රදර්ශන - කෘෂිකාර්මික ප්‍රදර්ශන සහ වෙළඳ ප්‍රදර්ශන සඳහා සහභාගී වීම ඔබේ නිෂ්පාදන සැබවින්ම උනන්දුවක් දක්වන ගැනුම්කරුවන්ට නිරාවරණය කරයි. මෙම ක්‍රමය අනෙක් ක්‍රම වලට වඩා  වඩා ඉතා පලදායි වේ. ඔබගේ ප්‍රදේශයේ කෘෂිකාර්මික ප්‍රදර්ශන හෝ ජාත්‍යන්තර ප්‍රදර්ශන සොයා ගන්න, ඔබට සැබෑ ගැනුම්කරුවන් අල්ලා ගැනීමට හොඳ අවස්ථාවක් තිබේ. සාමාන්‍යයෙන් බොහෝ ලංකාවේ වසරකට ප්‍රදර්ශන රාශියක් ඇති අතර පුවත්පත් නිවේදන මගින් සහ පෝස්ටර් මගින් දැනුම් දෙනු ලැබේ. කෘෂිකර්ම දෙපර්තමෙන්තුවන් පවා ඔබට ඒ පිළිබද විස්තර ලබා ගත හැකිය. 

5. රජයේ දෙපාර්තමේන්තු - ඔබ මහා පරිමාණ ව්‍යාපාර සහ අපනයන ව්‍යාපාර සඳහා යන්නේ නම්, ඔබට අපනයන සංවර්ධන මණ්ඩල (Export Development Board) වැනි සමහර රාජ්‍ය දෙපාර්තමේන්තු ඇත. ඔබට ඔවුන් සමඟ කතා කර ජාත්‍යන්තර ගැනුම්කරුවන් පිළිබඳ තොරතුරු හෝ ඇණවුම් ලබා ගත හැකිය. කෙසේ වෙතත් ඔබ මෙම මාර්ගයේ ගැනුම්කරුවන් සොයා ගැනීමට යන්නේ නම්, ඔබේ නිෂ්පාදන ජාත්‍යන්තර ප්‍රමිතීන්ට හා සහතිකවලට අනුකූල විය යුතුය.

ඔබේ කෘෂිකාර්මික නිෂ්පාදන සඳහා ගැනුම්කරුවෙකු සොයා ගැනීමට ඔබට භාවිතා කළ හැකි පොදු ක්‍රමය මේවායි. මෙම ක්‍රම භාවිතයෙන් හොද ව්‍යාපාරයක් සිදු කිරීමට හැකියාව ඇත. 

කෘෂිකාර්මික ව්‍යාපාරයක් සඳහා සුදුසු දේපලක් තෝරා ගන්නේ කෙසේද?

සුදුසු දේපලක් තෝරා ගැනීම නිෂ්පාදනවල පිරිවැය සමඟ සෘජුවම සම්බන්ධ වේ. කෘෂිකාර්මික ව්‍යාපාරයක් සඳහා ඔබට අවශ්‍ය ප්‍රධාන දේපළ වන්නේ ඔබ කෘෂිකාර්මික වගාවක්  ආරම්භ කිරීමට යන්නේ නම් ඉඩමක් හෝ අගය එකතු කළ නිෂ්පාදන ගැන සිතන්නේ නම් ගොඩනැගිල්ලකි. දේපල වර්ගය කුමක් වුවත්, තෝරාගැනීමේදී පහත සාධක සලකා බැලිය යුතුය.

1. වෙළඳපලට සහ අමුද්‍රව්‍ය ලබාගැනීමට ඇති දුර - ඔබ ඔබේ වෙළඳපොළෙන් හෝ අමුද්‍රව්‍ය සැපයුමෙන් දුරස්ථව ඇති ස්ථානයක් තෝරා ගන්නේ නම්, ඔබ නිෂ්පාදනයට අමතර ප්‍රවාහන වියදම් සහ නාස්තිය සදහා පිරිවැය එකතු කළ යුතුය. එය ඔබගේ නිෂ්පාදන මිල ඉහල යාමට හේතුවක් වේ. එබැවින් ඔබේ කර්මාන්ත ශාලාවට හෝ ගොවිපොළට ඔබේ වෙළඳපොළෙන් සහ අමුද්‍රව්‍ය සැපයුමෙන් ඇති දුර අවම කිරීම ඔබට වාසිදායක වේ. 

2. යටිතල පහසුකම් - ඔබේ ව්‍යාපාරයට අවශ්‍ය ප්‍රධාන යටිතල පහසුකම් වන්නේ විදුලිය, ප්‍රවාහනය හා ජලයයි. එබැවින් දේපලක් තෝරාගැනීමේදී මෙම මූලික යටිතල පහසුකම් තිබේද නැද්ද යන්න පරීක්ෂා කර බැලිය යුතුය. මේවාට අමතරව, ඔබේ ව්‍යාපාර ස්වභාවය අනුව දුරකථන, අන්තර්ජාල, රසායනාගාර අවශ්‍ය විය හැකිය. එබැවින් එම අවශ්‍ය යටිතල පහසුකම් තිබේද යන්න පරීක්ෂා කර බැලිය යුතුය.

3. අවට පරිසර තත්ත්වය - සමහරවිට අවට ප්‍රදේශය කුරුලු අභයභූමිය, ජාතික වනෝද්‍යානය වැනි ආරක්ෂිත ප්‍රදේශයකට ආසන්න විය හැකිය. එසේ උවහොත් අදාළ බලධාරීන් විසින් ලබා දී ඇති මාර්ගෝපදේශයන්ට අනුව ඔබේ ව්‍යාපාර ක්‍රියාවලිය සකස් කිරීමට ඔබට සිදු විය හැකිය. එය වියදම් අධික වීමටද ඉඩ තිබේ. 

සමහර විට ඔබේ දේපළ දුප්පතුන් ජීවත් වන ග්‍රාමීය ගමකට ආසන්න විය හැකිය; මෙම අවස්ථාවේ දී ඔබට අඩු වැටුපකට, නුපුහුණු ශ්‍රමිකයන් බඳවා ගැනීමෙන් ප්‍රතිලාභ ලබාගත හැකිය.

4. දේපලෙහි අනාගත වටිනාකම - ජනගහනය වර්ධනය වී ඉල්ලුම වැඩිවීමත් සමඟ බොහෝ විට දේපලවල වටිනාකම කාලයත් සමග වැඩි වේ. කෙසේ වෙතත් සමහර අවස්ථාවල ඔබේ දේපලෙහි අනාගත වටිනාකම අඩු වේ. නිදසුනක් ලෙස, යම් හානිකර අපද්‍රව්‍ය බැහැර කරන වෙනත් ව්‍යාපාරයක් ඔබේ දේපළ අසල ආරම්භ වන්නේ නම්, කාලයත් සමඟ ඔබේ දේපළ වටිනාකම අඩු වීමට එය හේතුවක් විය හැකිය. එබැවින් ඔබ අසල සිදුවන්නේ කුමක්ද යන්න පිළිබඳ අදහසක් ලබා ගැනීම වඩා හොඳය. 

කෙසේ වෙතත්, ඔබට යම් විශාල ලාභයක් කෙටි කාලයක් තුළ ලබා, ඔබේ ආයෝජනය අය කර ගැනීමට හැකියව ඇති නම්, දේපල වටිනාකම ගැන වැඩිපුර කරදර විය යුතු නැත.

5. අත්පත් කර ගැනීමේ ක්‍රමය - ඔබේ ව්‍යාපාර සැලැස්ම මත, කෙටි කාලීන කල්බදු, දිගු කාලීන බදු, මිලදී ගැනීම වැනි ඔබට අවශ්‍ය දේපළ අත්පත් කර ගැනීමට බොහෝ ක්‍රම තිබේ. ඔබ එම දේපලෙහි දිගුකාලීන ව්‍යාපාරයක් සැලසුම් කරන්නේ නම්, මිලදී ගැනීම හෝ දිගු කාලීන බදු (අවුරුදු 20 -30) සඳහා යාමට වඩා හොඳය. එය අනාගත ගැටළු අවම කරනු ඇත. අනෙක් අතට, ඔබ එකම ස්ථානයක ව්‍යාපාරය කරගෙන යාමට අදහස් නොකරන්නේ නම්, ඔබට කෙටිකාලීන බදු ක්‍රමයට යා හැකිය.

6. වෙනත් උපකාරක සේවාවන් වෙත ඇති දුර - වෙනත් උපකාරක සේවාවන් ද සමීපයේ පිහිටි ස්ථානයක් ඔබට සොයා ගත හැකි නම් වඩා හොඳය. වෙනත් සේවාවන් යනු බැංකු, කුලී නිවාස, සුපිරි වෙළඳසැල්, රෝහල් සහ රජයේ කාර්යාල ය. මෙම සියලු සේවාවන් සමඟ ඔබේ දේපළ වටිනාකම මෙන්ම ඔබේ ආයෝජන ද ඉහළ යනු ඇත.

ඉහත සියලු සාධක සපුරාලන දේපලක් සොයා ගැනීම පහසු නොවනු ඇත. කෙසේ වෙතත් ඔබ ඉහත සඳහන් සියලු සාධක නිසි ලෙස අධ්‍යයනය කළ යුතු අතර ව්‍යාපාරය සඳහා දේපලක් තෝරා ගැනීමේදී ප්‍රශස්ත විසඳුමක් තෝරා ගත යුතුය. ඔබ මෙම සියලු සාධක සලකා බැලුවහොත්, ඔබට ව්‍යාපාරයට අමතරව දේපල මගින්ද අනාගතයේදී හොඳ ලාභයක් හෝ වටිනාකමක් උපයා ගත හැකිය.